தொழில் நகரமான திருப்பூரில் ஒரு குடும்பத்தில் உள்ள தாய் தந்தை இருவரும் பணிக்கு செல்ல வேண்டிய நிர்ப்பந்தம் இருப்பதால், அவர்கள் தங்களது குழந்தைகளை வீட்டிலேயே விட்டுச் செல்கின்றனர். காலை 8 மணிக்கு பணிக்குச் சென்றுவிட்டு வீடு திரும்ப இரவாகும் என்பதால் தங்களது குழந்தைகள் யாருடன் பழகுகிறார்கள், என்ன செய்கிறார்கள் என்பது அவர்களுக்கு அதிகம் தெரிய வருவதில்லை.

மேலும், தற்போது கொரோனா காரணமாக பள்ளிகள் இயங்காததால் அனைத்து குழந்தைகளும் வீடுகளிலேயே இருக்கின்றனர். அதிலும் குறிப்பாக பதின்பருவ சிறுமிகள் வீடுகளில் இருப்பது சுற்றுவட்டத்தில் வசிக்கும் காமக் கொடூரர்களுக்கு வசதியாக போய்விடுகிறது. அந்த சிறுமிகளிடம் ஆசை வார்த்தை கூறி பாலியல் துன்புறுத்தலில் ஈடுபடுவதால், பல்வேறு பிரச்சினைகளில் சிக்கி சிறுமிகள் சீரழிந்து வருகின்றனர்.

கடந்த வாரத்தில் உடுமலை அருகே வயதான கோவில் பூசாரி ஐயப்பன் (54) என்பவரால் 14 வயது சிறுமி கர்ப்பம் அடைந்தார். பூசாரியை கைது செய்து சிறையில் அடைத்தனர்.

கடந்த மாதம் அவிநாசி அருகே 11 வயது மகளையே பாலியல் வன்முறைக்கு உள்ளாக்கிய தந்தை பிரகாஷை அவரது மனைவி கொடுத்த புகாரின் பேரில் கைது செய்யப்பட்டு இதற்போது குண்டர் சட்டத்தில் சிறையில் அடைக்கப்பட்டுள்ளார்.

காங்கயம் அருகே, வீட்டின் அருகில் வசிக்கும் 15 வயது சிறுமியிடம் பழகிய மணி (21) என்பவரால் பள்ளி மாணவி கர்ப்பம் ஆனார், இதனால் அவர் காங்கயம் அனைத்து மகளிர் காவல்நிலைய போலீசாரால் கைது செய்யப்பட்டார்.

திருப்பூர் மங்கலம் அருகே சிறுமி காணாமல் போன அருள் தந்தை பழனிசாமி கொடுத்த புகாரில், 14 வயது சிறுமியை அழைத்துச் சென்று சமயபுரத்தில் குழந்தை திருமணம் செய்து பாலியல் வன்கொடுமை செய்துவிட்டு, ஒட்டன் சத்திரம் பஸ்நிலையம் அருகே சிறுமியை விட்டுவிட்டு தப்பியோடிய கதிரேசன் (40) கைது செய்யப்பட்டது என பட்டியல் நீள்கிறது.

இந்த வழக்குகளில் குற்றவாளிகள் கைது செய்யப்பட்டுள்ள நிலையில்இகுறிப்பாக பள்ளி மாணவிகளே அதிகம் பாதிக்கப்படுவது கண்கூடாக தெரிகிறது. இதுகுறித்து திருப்பூர் மாவட்ட சமூகநலத்துறை அலுவலர்களிடம் கேட்டபோது, பள்ளிகள் இயங்கும்போது ஒவ்வொரு பள்ளிக்கும் சென்று பெண் குழந்தைகளுக்கு விழிப்புணர்வை ஏற்படுத்தி வந்துள்ளதாக தெரிவித்தனர்.

திருப்பூர் மட்டுமின்றி தமிழகம் முழுக்கவே கொரோனா காலத்தில் பள்ளி மாணவிகள் மீதான பாலியல் ரீதியான தொல்லைகள் அதிகரித்துள்ளதால் போதிய விழிப்புணர்வை அரசு ஏற்படுத்த வேண்டும் என சமூக ஆர்வலர்கள் கோரிக்கை வைக்கின்றனர்.