உயர்நிலைப் பாடசாலைகளில் இடம்பெற்று வரும் முற்றுகைப் போராட்டத்தின் போது, Saint-Denis நகர மேயர் Bally Bagayoko குற்றச்செயல்களைத் தூண்டியிருக்கலாம் என்ற சந்தேகத்தின் அடிப்படையில், பரிஸ் காவல்துறையினர் நீதித்துறைக்கு முறைப்பாடு செய்துள்ளார். செப்டெம்பர் மாதம் 30ஆம் திகதி புதன்கிழமை, குற்றவியல் நடைமுறைச் சட்டத்தின் 40ஆவது பிரிவின் கீழ், Bobigny நீதிமன்றத்தின் அரசுத் தரப்பு வழக்கறிஞருக்கு இந்த முறைப்பாடு அனுப்பப்பட்டுள்ளதாக தகவல்கள் வெளியாகியுள்ளன.
LFI கட்சியைச் சேர்ந்த மேயர் Bally Bagayoko, போராட்டத்தின் போது வெளிப்படுத்திய அணுகுமுறை தெளிவற்றதாகவும், சேதப்படுத்தும் செயல்களுக்கு மறைமுக ஆதரவாகப் புரிந்துகொள்ளப்படக் கூடியதாகவும் இருப்பதாக காவல்துறை தரப்பு தெரிவித்துள்ளது. தீப்பற்றிய குப்பைத்தொட்டிக்கு அருகில் அவர் சிரித்தபடி நடனமாடியதுடன், அங்கிருந்த இளைஞர்கள் அவரது பெயரை முழக்கமிட்டதாகவும் குறிப்பிடப்பட்டுள்ளது. இத்தகைய செயற்பாடு, போராட்டத்தின் போது இடம்பெற்ற சேதப்படுத்தல்களை அடையாள ரீதியாக அங்கீகரிப்பதாகக் கருதப்படலாம் என காவல்துறை தரப்பு சுட்டிக்காட்டியுள்ளது.
இதற்கிடையில், செப்டெம்பர் 28 மற்றும் 29ஆம் திகதிகளில் Paul-Éluard உயர்நிலைப் பாடசாலைக்குச் சென்ற மேயர், மாணவர்களுக்கு ஆதரவு தெரிவித்து ஊடகங்களிடம் கருத்து வெளியிட்டிருந்தார். 15 மற்றும் 16 வயதுடைய இளைஞர்கள் மீது Flash-Ball ஆயுதங்கள் பயன்படுத்தப்படும்போது, அவர்களிடையே ஒற்றுமை உணர்வு ஏற்படுவது இயல்பானது என அவர் கூறியிருந்தார். எனினும், போராட்டத்தின்போது காவல்துறையினர் மீது வெடிகுண்டுகள் வீசப்பட்டதாகவும், இதுதொடர்பாக ஐந்து பேர் கைது செய்யப்பட்டதாகவும் காவல்துறை தரப்பு தெரிவித்துள்ளது. மேயரின் கருத்துகள் வன்முறையை நியாயப்படுத்துவதாகப் புரிந்துகொள்ளப்படலாம் என்றும் அது குறிப்பிட்டுள்ளது.
இணைந்திருங்கள்