(02.11.2026 – Thalam) டீசல் விலை சமீபத்தில் உயர்ந்திருந்தாலும், பள்ளி வாகன சேவை நடத்துபவர்கள் கட்டணத்தை உயர்த்த மாட்டார்கள் என்று ‘அனைத்துத் தீவு பள்ளி மாணவர் போக்குவரத்து சங்கம்’ பெற்றோர்களுக்கு உறுதியளித்துள்ளது.
எரிபொருள் விலை உயர்வால் சேவையைத் தொடர்ந்து நடத்துவதில் சிரமங்கள் ஏற்பட்டுள்ளதாகச் சங்கத்தின் தலைவர் மல்ஸ்ரீ டி சில்வா தெரிவித்தார். இருப்பினும், இந்த கூடுதல் சுமையை இப்போதைக்கு பெற்றோர்கள் மீது சுமத்தப்போவதில்லை என்று அவர் வலியுறுத்திக் கூறினார்.
பள்ளி வாகன சேவை வழங்குநர்களின் சுமையைக் குறைக்க, டீசல் விலையைச் சிறிதளவாவது குறைக்க அரசு பரிசீலிக்கும் என்று நம்புவதாக அவர் குறிப்பிட்டார்.
எரிபொருள் விலையில் ஏதேனும் குறைப்பு செய்யப்பட்டால், அதன் பலனாகப் பெற்றோர்களுக்கான போக்குவரத்துச் செலவும் குறையும் என்று அவர் மேலும் தெரிவித்தார்.
இதேவேளை எரிபொருள் விலை அண்மையில் உயர்த்தப்பட்டதைத் தொடர்ந்து,முச்சக்கர வண்டி கட்டணங்களை உயர்த்துமாறு ‘தேசிய கூட்டு முச்சக்கர வண்டி சாரதிகள் மற்றும் தொழிலாளர் சங்கம்’ முன்மொழிந்துள்ளதாக அதன் பொதுச் செயலாளர் எல். ரோஹன பெரேரா தெரிவித்தார்.
இதன்படி, முதல் கிலோமீட்டருக்கான கட்டணத்தை 110 ரூபாயிலிருந்து 120 ரூபாயாகவும், அதன் பிறகு ஒவ்வொரு கிலோமீட்டருக்குமான கட்டணத்தை 90 ரூபாயிலிருந்து 100 ரூபாயாகவும் உயர்த்துவதற்குச் சங்கம் முன்மொழிந்துள்ளது.
முன்னர் எரிபொருள் விலை உயர்த்தப்பட்டபோதும், கட்டணங்களை மாற்றியமைக்குமாறு சங்கம் கோரிக்கை விடுத்திருந்ததாகவும், ஆனால் அதற்கு எந்தப் பதிலும் கிடைக்கவில்லை என்றும் பெரேரா கூறினார்.
இந்த முன்மொழிவை ‘தேசிய போக்குவரத்து ஆணைக்குழுவிடம் சமர்ப்பிக்கவுள்ளதாகவும்> அடுத்த சில நாட்களில் அதற்கான பதில் கிடைக்கும் வரை காத்திருக்கப்போவதாகவும் அவர் தெரிவித்தார்.
இணைந்திருங்கள்